Bakı Beynəlxalq Multikulturalizm Mərkəzinin (BBMM) “International Journal of Multiculturalism” (“Beynəlxalq Multikulturalizm Jurnalı”) adlı beynəlxalq elmi jurnalının 2024-cü ildə ikinci sayı işıq üzü görüb. İldə iki dəfə ingilis dilində nəşr olunan jurnalın saytı da (http://bimc-ijm.com/index.aspx) fəaliyyət göstərir.
Jurnalda Türkiyənin Dokuz Eylül Universitetindən Ülviyyə Sanılı Aydının “Azərbaycan multikulturalizm geosiyasətinin qısa icmalı”,  Sinem Abkanın “Avropa Birliyi-Türkiyə münasibətlərinə yeni baxış: Yunan azlıqlarına multikultural yanaşma”, Aydın Adnan Menderes Universitetindən Kvanç Güvəncin “Avropada sağçı partiyaların yüksəlişi: Qloballaşma və multikulturalizm”, Bolqarıstanın Cənub-Qərb Universitetindən Kristina Apostolidounun “Linqvistik səriştəliliyin təkmilləşdirilməsi üçün ədəbi mətnlərdən istifadə olunması: ingilis və fransız dilini öyrənən yunan tələbələri üçün proyeksiyalar” adlı məqalələri yer alıb. 
Məlumat üçün bildirək ki, bütün beynəlxalq standartlara cavab verən “International Journal of Multiculturalism” jurnalı regionda bu istiqamətdə ilk elmi nəşr sayılır. Elmi nəşrin redaksiya heyəti bu sahədə tanınmış xarici mütəxəssislərdən formalaşıb. Jurnalda elmi məqalələrlə çıxış etmək istəyən tədqiqatçı-alimlər yazılarını multiculturalismjournal2020@gmail.com email ünvanına göndərə bilərlər. “International Journal of Multiculturalism” jurnalının PDF variantı həm BBMM-in, həm də jurnalın saytında yerləşdirilir.