Bakı, 12 noyabr

Azərbaycan Respublikası Prezidenti Administrasiyasının Millətlərarası münasibətlər, multikulturalizm və dini məsələlər şöbəsinin müdiri Etibar Nəcəfov noyabrın 12-də Fransanın məşhur ictimai televiziya kanalı “France 2”nin çəkiliş qrupuna müsahibə verib.

Həmin çəkiliş qrupu “İslam dünyada” televiziya layihəsi çərçivəsində müsəlman ölkələrin tarixi, dini və mədəni irsi haqqında silsilə verilişlər hazırlayır. Növbəti iki veriliş Azərbaycana həsr olunacaq.

Etibar Nəcəfov müsahibəsində rəhbərlik etdiyi şöbənin əsas fəaliyyət istiqamətləri haqqında danışıb, Azərbaycan dövlətinin ölkədə etno-mədəni və dini durumun tənzimlənməsi istiqamətində həyata keçirdiyi siyasət haqqında ətraflı məlumat verib. O qeyd edib ki, tarixən müxtəlif dinlərin və xalqların nümayəndələrinin sülh, əmin-amanlıq və qarşılıqlı etimad şəraitində yaşadığı Azərbaycanda multikulturalizm dövlət siyasəti səviyyəsinə qaldırılıb.

Şöbə müdiri vurğulayıb ki, multikulturalizm Azərbaycanın daxili siyasətinin tərkib hissəsi olaraq ölkədə dövlət-din münasibətlərinin yüksək səviyyədə tənzimlənməsinə, respublikamızda yaşayan azsaylı xalqların və etnik qrupların etnik-mədəni dəyərlərinin qorunmasına səbəb olur. O bildirib ki, beynəlxalq müstəvidə multikulturalizm siyasətinin həyata keçirilməsi nəticəsində Azərbaycan Respublikası mədəniyyətlərarası və sivilizasiyalararası dialoqun təşviq olunması sahəsində böyük uğurlara imza atıb. Belə uğurlardan biri artıq siyasi leksikona daxil olmuş “Bakı Prosesi”dir. Bu təşəbbüs ilk dəfə Azərbaycan Respublikasının Prezidenti İlham Əliyev tərəfindən 2008-ci il dekabrın 2-3-də Bakıda “Mədəniyyətlərarası dialoq Avropa və onun qonşu regionlarında davamlı inkişafın və sülhün əsasıdır” mövzusunda keçirilmiş beynəlxalq konfransda irəli sürülüb.

Şöbə müdiri bu ayın 14-15-də “Bakı Prosesi” çərçivəsində keçiriləcək Dünya dini liderlərinin II Bakı sammitinə diqqət çəkib, həmin tədbirin əhəmiyyəti haqqında məlumat verib.

Sonda çəkiliş qrupuna ölkəmizin zəngin tolerant və multikultural ənənəsini əks etdirən kitablar hədiyyə olunub.