Kamal Abdullayev: Yay məktəbinin iştirakçıları Azərbaycan həqiqətlərinin dünyaya çatdırılmasında əllərindən gələni edəcəklər

 

15013351956331535293_1000x669

İyulun 29-da Bakı Beynəlxalq Multikulturalizm Mərkəzinin (BBMM) Himayəçilik Şurasının sədri, akademik Kamal Abdullayev Prezident İlham Əliyevin tövsiyəsi, BBMM, UNESCO, “Erasmus+”, “ALADDİN layihəsi” və Azərbaycanın Gənc Dostları Klubunun (AGDK) birgə təşkilatçılığı ilə keçirilən “Mədəniyyətlərarası dialoq dini və mədəni müxtəliflik kontekstində - Azərbaycanda dinlərarası harmoniya” adlı V Beynəlxalq multikulturalizm yay məktəbinin iştirakçıları ilə görüşüb.

Tədbirdə K.Abdullayev Azərbaycan həqiqətlərinin dünya ictimaiyyətinə çatdırılması baxımından yay məktəbinin əhəmiyyətindən danışıb. Bildirilib ki, beynəlxalq multikulturalizm qış və yay məktəbləri layihəsi BBMM-in “Azərbaycan multikulturalizmi fənninin xaricdə və ölkə universitetlərində tədrisi” layihəsinin davamıdır. Tədris layihəsi çərçivəsində hazırda dünyanın 15, Azərbaycanın 38 nüfuzlu ali təhsil ocağında tələbələr üçün qış və yay məktəbləri təşkil olunub. Əsas məqsəd həmin gənclərin nəzəri şəkildə öyrəndiklərini multikultural və tolerant dəyərlərin qorunub yaşandığı ölkəmizdə öz gözləri ilə görüb şahid olmalarına şərait yaratmaqdır.

“Azərbaycanın Gənc Dostları Klubunun üzvləri ilə daim əlaqədə olaraq onların üzləşdikləri problemlərin aradan qaldırılmasında yaxından iştirak edəcəyik. Həmçinin klubun üzvləri Azərbaycanda müxtəlif mövzularda təşkil ediləcək konfranslara, “dəyirmi masa”lara və digər tədbirlərə dəvət olunacaqlar. Klubun üzvləri Azərbaycanı özlərinə dost bildikləri kimi, Azərbaycan da sizi özünə dost bilir”, - deyə Kamal Abdullayev qeyd edib.

Vurğulanıb ki, Prezident İlham Əliyevin Sərəncamı ilə ötən ilin ölkəmizdə “Multikulturalizm ili” elan edilməsi və həmin ilin fonunda görülən bütün işlər Azərbaycan multikulturalizminin dünyada təbliği və təşviqi istiqamətində bir-birini tamamlayan, sistemli hərəkata çevrilən siyasi iradənin tərkib hissəsidir. Azərbaycanın son dərəcə tolerant, multikultural dəyərlərlə yaşayan bir ölkə olduğunu deyən akademik diqqətə çatdırıb ki, bu ənənənin əsası ulu öndər Heydər Əliyev tərəfindən qoyulub. Prezident İlham Əliyev isə Azərbaycan multikulturalizminin perspektivlərini göstərdi, bugünkü vəziyyətini bir daha təsbit etdi. Azərbaycan hökumətinin sistemli şəkildə həyata keçirdiyi və dövlət siyasətinin prioritet istiqamətlərindən biri kimi müəyyənləşdirdiyi multikulturalizm siyasəti nəticəsində qazanılan uğurlar ölkəmizin dünyada multikultural dövlət imici əldə etmiş mərkəz kimi tanınmasına, bir çox dünya dövlətlərinə, o cümlədən Avropaya örnək olmasına zəmin yaradıb. İştirakçıları Azərbaycanın inkişaf tarixi, o cümlədən Dağlıq Qarabağ münaqişəsi barədə məlumatlandıran K.Abdullayev onların Azərbaycan həqiqətlərinin dünya ictimaiyyətinə çatdırılmasında əllərindən gələni edəcəklərinə əminliyini bildirib.

Sonda yay məktəbinin iştirakçılarını maraqlandıran suallar cavablandırılıb.

Запись Kamal Abdullayev: Yay məktəbinin iştirakçıları Azərbaycan həqiqətlərinin dünyaya çatdırılmasında əllərindən gələni edəcəklər впервые появилась Bakı Beynəlxalq Multikulturalizm Mərkəzi.